Хæххон паддзахадон аграрон университеты æнæпилотон системæты центры ацыд Уæрæсейы Хъæбатыр Тыбылты Мараты номыл дрон-рейсингæй фыццаг турнир.
Конкурс æрæмбырд кодта, нырыккон технологитæ, инженерон æмæ æнæпилотон системæтæ цымыдис кæмæ кæсынц, Цæгат Ирыстоны ахæм скъоладзаутæ æмæ студентты.
Турнир цыд дыууæ боны. Республикæйы скъоладзаутæ сæ арæхстдзинад равдыстой «Юные асы»-йы къæпхæны фæлгæтты. Уый фæстæ уагъд æрцыд студенттæ æмæ хистæркъласонтæн «Чемпионская гонка». Архайджытæ тахтысты профилон БПЛА-ты тренажертæй, фæлвæрдтой сæхи тагъды æмæ бæлвырды.
Ерысты аразджытæ уыдысты Цæгат Ирыстоны Хетæгкаты Къостайы номыл паддзахадон университет, Хæххон паддзахадон аграрон университет, стæй Дзæуджыхъæуы бынæттон хиуынаффæйады администраци.
Цæгат Ирыстоны паддзахадон университеты робототехникæ æмæ уæлæмхасæн технологиты центры разамонæг Тотыккаты Александр фæбæрæг кодта, зæгъгæ, æнæпилотон технологитæ абон æркуырд сты канд æфсæддонты нæ, фæлæ ма арæзтады, инженерон, хъæууон хæдзарады æмæ æндæр къабæзты дæр.
«Цæгат Ирыстонæн ис æппæт фадæттæ, цæмæй суа Цæгат Кавказы æнæпилотон системæтæ æмæ робототехникæйы райрæзты фæзуат. Ныфс нæ ис республикæйы хицауады æххуысыл æмæ фæнд кæнæм ауадзын турниры дыккаг этап ацы фæззæджы, сыхаг регионтæй æмæ æндæр уæрæсейаг субъекттæй архайджыты æрбахонгæйæ», – фæнысан кодта Тотыккаты Алыксандр.
Конкурс арæзт æрцыд фæсивæды æфсæддон-патриотон хъомылады фæлгæтты æмæ инженерон, технологион, информацион технологитæм цымыдисдзинад фæбæрзонддæр кæныны тыххæй.
Турнир ауадзынæн финансон æххуыс бакодта хæрзаудæн æмæ «Pravda»-йы промоушены разамонæг Цопанты Хетæг. Уый баххуыс кодта конкурсы ацыдæн æмæ сфидар кодта æхцайы премитæ. Уæлахиздзаутæ райстой 25 мин сомы, дыккаг бынат бацахсджытæ -15 мин сомы, æртыккаг бынæттæ чи бацахста, уыдон та – 10 мин сомы.
Во Владикавказе прошел первый турнир по дрон-рейсингу имени Героя России Марата Тибилова