Ирон филологийы факультеты ацыд Гом дуæртты бон, нысангонд цыд ирон æвзаг æмæ литературæйы боны бæрæгбонмæ, архайдтой дзы скъоладзаутæ æппæт республикæйæ.
Мадзал байгом флешмобæй: æрæмбырдуæвджытæ азарыдысты зарæг «Фондз минуты»-йы мелодийыл иронау алы бон дæр 15 сахаты æмæ 15 минутыл фондз минуты сæ мадæлон æвзагыл ныхас æмæ хъуыды кæнынæны хъæппæрисимæ.
Уый фæстæ мадзал ахызт Ахуыргонд Советы залмæ, ам ацыд Уæрæсейы адæмты мадæлон æвзæгтæ æмæ литературæтæй скъоладзауты федералон олимпиадæйы архайджыты хорзæхджын кæныны церемони. Скъоладзаутæн I, II æмæ III къæпхæны майдантæ æмæ дипломтæ радтой наукон дæсныйадæй ректоры хæдивæг Тенгиз Тиникашвили æмæ экономикæ æмæ академион интеграцийæ ректоры хæдивæг Зæгæлты Залинæ. Олимпиадæ ацыд ацы аз февралы, æмæ дзы архайдтой 198 скъоладзауы 8-æмæй 11-æм къласмæ. Уæлахиздзаутæ ма райсдзысты уæлæмхасæн 5 баллы ЦИПУ-мæ бацæуынæн гуманитарон дæсныйæдтæй.
Программæйы ахсджиаг хай уыд Хетæгкаты Къостайы æмдзæвгæты æмбырдгонд «Ирон фæндыр»-ыл ныхас. Æмбырды архайджытæ иумæ бакастысты æмбырдгондæй уацмыстæ æмæ уыдонмæ гæсгæ сæххæст кодтой зарджытæ.
Уæлдай æргом здæхт æрцыд ирон фыссынадмæ. Архайджытæ æрдзырдтой ирон алфавиты рæзты историон фæзилæнтыл, уыимæ кириллицæйы æмрæнхъ латинаг алфавитæй дæр пайда кæныныл, стæй ма рахастой фарст, нырыккон ирон фыссынады латинаг дамгъуатæй пайда кæнын æмбæлон у æви нæ, уый тыххæй дæр.
«Кæй зæгъын æй хъæуы, ацы хъуыддаджы фæдыл, гæнæн ис, алкæмæн дæр йæхи хъуыды ис. Фæлæ ахсджиаг у фæнысан кæнын, суанг ма Хетæгкаты Къоста дæр – ирон литературон æвзаджы бындурæвæрæг – кæй пайда кодта кириллицæйы алфавитæй æмæ æрмæстдæр цалдæр дамгъæйы латинаг алфавитæй. Уымæ гæсгæ, æмбæлы бахъахъхъæнын кириллицæ, кæцыйæ ирон адæм пайда кодтой сæдæ азы дæргъы», – загъта ирон филологиы факультеты декан Гуытъиаты Эльмирæ.
Фембæлды официалон хайы фæстæ архайджытæ адарддæр кодтой сæ ныхас æнæформалон æгъдауæй æмæ бахастой сæ фæндон факультеты фидæны ахуырадон æмæ культурон хъæппæристы архайын.
День открытых дверей прошел на факультете осетинской филологии