Цæгат Ирыстоны Хетæгкаты Къостайы номыл паддзахадон университеты ацыд республикæйы университетты ректорты советы æмбырд, цæмæй æрныхас кæной фидæны ахуырмæ исыны кампанийыл.
Фембæлды архайдтой Цæгат Ирыстоны ахуырад æмæ наукæйы министр Алибекты Элла, Территориалон хицауады сæргълæууæг æмæ Уæрæсейы Фæсарæйнаг хъуыддæгты министрады минæвар Дзæуджыхъæуы Мамиаты Багир, Цæгат Ирыстоны сæргълæууæджы мидполитикæйы фæдыл аппараты сæргълæууæг Бекъойты Марат, Цæгат Кавказы хæххон металлургон институты ректор Хъамболты Дзамболат, Паддзахадон хъæууонхæдзарадон университеты ректор Гогаты Олег, Цæгат Ирыстоны паддзахадон медицинон академийы регионалон æнæниздзинадхъахъхъæнынады рæзт æмæ иртасæн куыстыты проректор Дзгойты Мадинæ, Дзæуджыхъæуы разамынды институты ректор Цуциты Мадинæ, æмæ Цæгат Ирыстоны СХО-йы ветеранты ассоциацийы минæвæрттæ. Дискуссийы ма архайдтой ахуырадон политикæйы хайады сæргълæууæг Алла Калиниченко æмæ Цæгат Ирыстоны паддзахадон университеты исæн къамисы абитуриенттимæ ахастдзинæдты хайады сæргълæууæг æмæ бæрнон нымæрдар Анна Хожая.
Æмбырды архайджытæ уæлдай æргом аздæхтой сæрмагонд хæстон операцийы архайджыты æмæ сæ бинонты уæнгты райсынæн уавæртæ аразыныл ныхас кæнынмæ.
Цæгат Ирыстоны паддзахадон университеты ректор æмæ РЦИ-Аланийы ректорты советы сæрдар Огъуаты Алан куыд бафиппайдта, афтæмæй ахсджиаг у рагагъоммæ æркуырд чи у, уыцы дæсныйæдтæн анализ скæнын æмæ СХО-йы архайджытæ æмæ сæ бинонты ‘рдыгæй фæлварæн æвзарыны спецификæ хынцгæйæ. Огъуаты Алан ма фæнысан кодта, зæгъгæ, профориентаци хъуамæ райдайа СВО-йы архайджыты сывæллæттæ нырма скъолайы куы вæййынц, уæдæй, цæмæй уыдон рагацау бамбарой сæ равзæрст ахуыры здæхтытæм бацæуыны домæнтæ. Йæ ныхасмæ гæсгæ, ахсджиаг кæй у скъоладзаутæн рæстæгыл амынддзинæдтæ дæттын Иумæйаг паддзахадон фæлварæнæн предметтæ æвзаргæйæ, уымæн æмæ уый бæрæг кæны бæлвырд факультетмæ бацæуыны фадат.
«Нæ нысан у бамбарын, цавæр ахуыры здæхт равзарынц абитуриенттæ æмæ цавæр дæсныйæдтæ сты фылдæр æркуырд СХО-йы архайдытæ æмæ сæ бинонты ‘хсæн. Уый къухы бафтын кæныны тыххæй республикæйы университетты хъæуы æнгом æмархайд саразын СХО-йы ветеранты ассоциациимæ, цæмæй æвæстиатæй рабæрæг кæной сæрмагонд хæстон операцийы архайджыты бинонты курдиæттæ æмæ дарддæр рæзын кæной æххуысы механизмтæ кампанийы райсты фæлгæтты», – фæнысан кодта Огъуаты Алан.
Ныхасы рæстæг фæнысан кодтой, æппынкъаддæр 10% бюджетон бынæттæ университетты хъуамæ лæвæрд æрцæуой хицæн квотæйы фæлгæтты СХО-йы архайджытæн. Уыимæ алы университет дæр хæдбарæй бæрæг кæны квотæты бæрц, йæ гæнæнтæ æмæ ахуырадон фæзуæтты структурæмæ гæсгæ.
Фембæлды архайджытæ ма æруынаффæ кодтой СХО-йы архайджытæн æмæ сæ бинонтæн æххуысы уæлæмхасæн механизмтыл ахуырмæ бацæуыны рæстæджы. Сæрмагондæй, кæд æмæ паддзахадон бюджетон бынæттæ нæй сæ равзæрст программæйы, уæд абитуриенттæн гæнæн ис æмæ лæвæрд æрцæуой ахуыры аргъæн фæкъаддæр кæнæ студентон кредиттæ бæлвырд дæсныйæдты номхыгъдæн.
Совет ректоров обсудил поступление участников СВО и членов их семей в вузы республики в СОГУ