Цæгат Ирыстоны Хетæгкаты Къостайы номыл паддзахадон университеты æрымысыдысты Скæсæны кадджындæр персайнаг поэт, историон эпикон поэмæ «Шахнаме»-йы автор Хаким Абулкасим Фирдоусийы ном.
Мысæн мадзал ацыд ЦИПУ-йы зонадон чиныгдоны раз поэты цыртдзæвæны цур. Архайдтой дзы ЦИПУ æмæ ЦКХМИ-йы ахуыргæнджытæ, кусджытæ æмæ студенттæ, стæй уазджытæ Иранæй.
Мадзал байгом кодта Цæгат Ирыстоны паддзахадон университеты цур ирайнаг культурæйы центры директор Сохиты Мадинæ. Уый фæнысан кодта, зæгъгæ, Фирдоусийы бынтæ баззадысты культурон фæзуаты ахсджиаг хайæ, кæцы иу кæны адæмты Иранæй дарддæр, æмæ поэт йæхæдæг кæй ссис персайнаг æвзаг æмæ националон æууæлтæ бахъахъхъæныны символ.
«Абон мах ам стæм, цæмæй ма иу хатт кад кæнæм Фирдоусийы генийæн – национ хиæмбарынады стыр архитекторæн, ирайнаг æмхуызонады æмæ персайнаг æвзаг æмæ литературæйы сног кæныны символæн. Дзырд «Фирдоуси» йæхæдæг нысан кæны «дзæнæт» персайнаг æвзагыл. Æмæ суанг пысылмон традицийы дæр у дзæнæты бæрзонддæр æмвæзад, Сфæлдисæджы паддзахбадæнмæ хæстæг. Чи зоны, уымæн æвзæрын кæнынц Фердоусийы æмдзæвгæтæ уарзондзинад, сæрибардзинад, царды мидис, æмæ дунеты ‘хсæн диалогы тыххæй иууыл бæрзонддæр уæздан импульстæ», – загъта Сохиты Мадинæ.
Мадзалы ма раныхас кодтой историон факультеты декан Плиты Залинæ, ирон филологийы факультеты декан Гуытъиаты Эльмирæ, театралон аивæдты кафедрæйы сæргълæууæг Æлбегаты Алан, актер æмæ театры режиссер Цæриаты Валерий.
Шахнамейæ æвзæрст скъуыддзæгтæ бакастысты фарсийыл ЦИПУ-йы историон факультеты студенттæ, ЦКГМИ-йы студенттæ та сæ бакастысты таджикаг æвзагыл. Мадзал фæцис поэты цыртдзæвæныл дидинджытæ сæвæрынæй.
Уый фæстæ ацыд ирон æвзаджы райрæзты центр «РЦИ-Аланийы истори æмæ археологийы институт»-ы зонадон кусæг Бтемыраты Таймуразы лекци æмæ мастер-класс. Ахуыргонд æрдзырдта персайнаг æмæ ирон æвзæгты лексикон параллелтыл, стæй ма равдыста персайнаг каллиграфийы бындуртæ.
