Сывæллæтты хъахъхъæныны бон Цæгат Ирыстоны Хетæгкаты Къостайы номыл паддзахадон университеты психологон-педагогон факультеты хъæппæрисæй байгом студентты, кусджыты æмæ ахуыргæнджыты сывæллæттæн цыбыр æмгъуыдмæ Сывæллæтты клуб.
Проект здæхт у, сæ ахуыр кæнæ профессионалон куыст скъолайы агъоммæ кары сывæллæтты хъомыладимæ чи иу кæны, уыцы студенттæн, ахуыргæнджытæн æмæ кусджытæн æххуысæн.
Йæ байгом кæныны кадджын мадзалы архайдтой Дзæуджыхъæуы бынæттон хиуынаффæйады администрацийы сæргълæууæджы хæдивæг Ходы Мадинæ, ЦИПУ-йы ректор Огъуаты Алан, университеты администраци, ахуыргæнджытæ, кусджытæ, студенттæ æмæ сæ сывæллæттæ.
Сывæллæтты клуб ис ЦИПУ-йы 1-аг æмдзæрæны фыццаг уæладзыджы æмæ дзы уыцы иу рæстæг бацæудзæн 15 скъолайы агъоммæйы кары сывæллоны онг. Сывæллонæн йæ бон уыдзæн уым уæвын цыппар сахаты.
Сывæллæттæн æмæ ныййарджытæн арæзт æрцыдысты нырыккон фадæттæ. Йе сконды ис мад æмæ сывæллоны уат, хъазæн фæзуат, анимацион студи, кълас æмæ инвалид сывæллæттимæ кусыны кусæнгæрзтæ. Æппæт лæггæдтæ дæр уыдзысты лæвар.
Ацы хъæппæрис бантыст федералон субсиди, ЦИПУ-йы бюджеты æдде фæрæзтæ, стæй Паддзахадон Думæйы депутат Мæхъиты Зурабы æхцайы фæрæзтæй фæкасты фæрцы, проектæн рахицæн кодта иу милуан сомы.
ЦИПУ-йы ректор Огъуаты Алан фæнысан кодта, клубы байгом кæй уыдзæн университеты æрыгон бинонтæн æххуысы ахсджиаг мадзал.
«Ай у ахсджиаг къахдзæф, чысыл сывæллæтты чи хъомыл кæны уыцы студенттæн æмæ кусджытæн æххуыс кæныны хъуыддаджы. Алы хатт нæ вæййы фадат æнахъом сывæллоны рæвдауæндонмæ бакæнын кæнæ йын хъомылгæнæг ссарын. Ныр ныййарджытæн сæ бон у сæ сывæллæтты университетмæ æрбакæнын æмæ ныфсджын уæвын, æнцонвадат æмæ æдас уавæры кæй уыдзысты. Уымæй уæлдай ма сывæллæтты клуб суыдзæн практикон платформæ психологон-педагогон факультеты студенттæ æмæ ахуыргæнджытæн. Ам цæудзæн сывæллæттимæ хæрзхъæд куыст, фидæны специалисттæн сæ бон уыдзæн ахадгæ профессионалон фæлтæрддзинад райсын», – фæнысан кодта Огъуаты Алан.
Клуб фадат ратдзæн психологон-педагогон факультеты студенттæн сæ профессионалон компетенцитæ фæбæрзонддæр кæнынæн, сывæллæтты хъомылады æмæ ахуыр кæныны нырыккон методтæ сахуыр кæнынæн, стæй царды уавæрты практикон арæхстдзинæдтæ райсынæн.
Æрыгон бинонтæн æнцонвадат æмæ хæлар уавæртæ аразын дзуапп дæттынц Уæрæсейы Федерацийы Президенты 2024 азы 7 майы 309-æм барамынды лæвæрд паддзахадон политикæйы нысанттæн, «2030 азмæ æмæ ма уымæй размæ 2036 азмæ Уæрæсейы Федерацийы национ рæзты нысæнтты тыххæй».
Проект æххæстгонд цæуы социалон æххуысы инфраструктурæйы мадзæлтты рауæрæх кæныны фæлгæтты æмæ йæ нысан у ахæм уавæртæ саразын, цæмæй æрыгон ныййарджытæн сæ ахуырадон процесс адарддæр кæнын уа æмæ сæ профессионалон рæзт æнæкъуылымпыйæ цæуа.
