Цæгат Ирыстоны Хетæгкаты Къостайы номыл паддзахадон университеты кусын райдыдта Æввахс Скæсæны истори æмæ геополитикæйы актуалон фæрстытыл зонадон клуб, здæхт у студентты ‘хсæн иртасæн цымыдисдзинад рæзын кæнынмæ.

Клуб арæзт æрцыд ЦИПУ-йы скæсæйнаг ахуырады студенттæн, кæцытæ ахуыр кæнынц «Ирайнаг здæхт»-ы хайады. Йæ нысан у, регионы нырыккон политикон, историон, культурон æмæ æхсæнадæмон процесстæм иртасæн цымыдисдзинад райтынг кæнын.

 «Æввахс Скæсæны истори æмæ геополитикæйы нырыккон проблемæты фæдыл зонадон клубы сырæзт у ахсджиаг къахдзæф ЦИПУ-йы скæсæйнаг ахуырад æмæ зонадон иртасæнты рæзты. Абон Æввахс Скæсæн у дунейы политикæйы сæйраг регионтæй иу, æмæ дзы цы процесстæ цæуы, уыдон арф анализ кæнынмæ чи арæхсы, ахæм специалистты ахуыр кæнын у стратегион нысаниуæг нæ бæстæйæн. Иртасджыты ног фæлтæры равзæрды фæзуат баххуыс кæндзæн студенттæн сæ зонадон гæнæнтæ раргом кæнынæн, аналитикон куысты дæсныйæдтæ райсынæн æмæ фыдыбæстæйон скæсæнзонынады рæзтæн ахъаз кæнынæн», – загъта ЦИПУ-йы ректор Огъуаты Алан.

Фыццаг фембæлд сарæзта Хъойбайти Барис, политикон зонæдты доктор, ЦИПУ-йы философи æмæ политологийы кафедрæйы профессор. Арфæйы ныхас загъта историон факультеты декан Плиты Залинæ дæр.

 «Абон Скæсæны специалисттæ сты къаннæг, фæлæ Уæрæсейæн уый у иууыл ахсджиагдæр фадгуытæй иу. Уымæ гæсгæ ныридæгæн уæ ахуыры рæстæджы ахсджиаг у фидæны иртасæнты темæ равзарын æмæ Ираны алыхуызон фадгуыты специалисттæй рæзын. Цæмæй бæстæ арф сахуыр кæнат, уый тыххæй хъæуы хъусдард здахын бирæ æууæлтæм: культурæйы, историон географийы æмæ историон наукæйы æнæфæхицæнгæнгæ хайы», – загъта уый.

Æрæмбырдуæвджытæ æруынаффæ кодтой Æввахс Скæсæны нырыккон политикæйы сæйраг фæрстытыл, регионалон конфликтты историон бындурыл, дунейон ахастыты системæйы Ираны бынатыл æмæ нырыккон геополитикон боны фæткы регионы нысаниуæгыл.

Уæлдай æргом здæхт æрцыд студентты арæхстдзинæдтæ рæзын кæнынмæ зонадон анализ, адæмы раз ныхас кæнын, дискусси æмæ дунейон фæрстытыл нырыккон æрмæджытимæ кусынмæ.

Клубы фембæлдтæ уагъд цæудзысты æппынæдзух, ЦИПУ-йы ахуыргæндтæ æмæ ахуыргæнджытæ, стæй хуынд эксперттæ кæсдзысты лекцитæ æмæ мастер-класстæ.

В СОГУ создан научный клуб по проблемам истории и геополитики Ближнего Востока