Цæгат Ирыстоны Хетæгкаты Къостайы номыл паддзахадон университет бафыста æмгуыстады бадзырд Дзæуджыхъæуы бынæттон хиуынаффæйады администрациимæ. Йæ фæрцы уæлдæр ахуыргæнæндæтты студенттæн сæ бон у фæсивæдон политикæйы практикон фæлтæрддзинад исын ахуыр кæнгæйæ.
Документ бафыстой ЦИПУ-йы зонадон дæсныйадæй ректоры хæдивæг Тенгиз Тиникашвили æмæ Дзæуджыхъæуы муниципалон администрацийы фæсивæдон политикæ, физкультурæ æмæ спорты комитеты сæрдар Айларты Зауыр.
Ног ахуыры азæй ЦИПУ райдайдзæн уадзын бакалавриаты программæ «Фæсивæдон куысты организаци». Студенттæ ахуыр кæндзысты фæсивæдон политикæйы реализацийы механизмтæ, проектон дæсныйад æмæ социалон инициативæты къухдариуæгад. Рауагъдонтæн сæ бон уыдзæн кусын фæсивæдон программæты директортæй, проектты разамонджытæй, карьерæйы консультанттæй æмæ фæсивæдимæ куысты специалисттæй.
Бадзырд фадат ратдзæн студенттæн, дыккаг курсæй фæстæмæ стажировкæ ацæуын горæты администрацийы хайæдты æмæ сæ райсгæ зонындзинæдтæй царды уавæрты спайда кæнынæн.
Тенгиз Тиникашвили раарфæ кодта Дзæуджыхъæуы администрацийæн се ‘мгуыстады тыххæй æмæ фæнысан кодта фидæны специалистты практикон цæттæдзинады ахсджиагдзинад.
«Практикæ студенттæн фадат дæтты æрмæст сæ теоретикон зонындзинæдтæ ныффидар кæнынæн нæ, фæлæ ма профессионалон, разамонæг æмæ къорды куысты компетенцитæ рæзын кæнынæн. Уый у ахсджиаг инвестици адæймагон капиталмæ, уымæ гæсгæ мах бузныг стæм горæтæй, нæ студентты райсынмæ æмæ сын хъæугæ дæсныйæдтæ райсынæн баххуыс кæнынмæ кæй хъавы, уый фæдыл», – загъта уый.
Айларты Зауыр та фæнысан кодта комитеты цымыдис æрыгон специалистты бацæттæ кæнынмæ æмæ сæ практикон мадзæлттæм бафтауынмæ фемхиц кæнынмæ.
«Фæлтæрддзинад цæуы æрмæстдæр практикæйы фæрцы. Цас тагъддæр студенттæ базонгæ уой фæсивæдон политикæйы реалон куыстытимæ, уыйас ныфсджындæр уыдзысты дæсныйады. Махæн уый у фадат бацæттæ кæнын фидæны профессионалты, кæцытæ ныридæгæн æмбарынц куысты спецификæ æмæ цæттæ сты проблемæтæ скъуыддзаг кæнынмæ», – загъта Айларты Зауыр.
Тенгиз Тиникашвили ма Айларты Зауырæн радта арфæйы фыстæг, сгуыхт тренер Айдарты Хъазыбеджы номыл мысæн Æппæтуæрæсеон сылгоймæгты турнир волейболæй саразынæн кæй баххуыс кодта, уый фæдыл.
