Цæгат Ирыстоны Хетæгкаты Къостайы номыл паддзахадон университеты стыр уырыссаг поэт æмæ нырыккон уырыссаг литературон æвзаджы бындурæвæрæг Александр Пушкины райгуырды 227 азы юбилейы агъоммæ сарæзтой номарæн мадзал.
Мадзал бацæттæ кодта Цæгат Ирыстоны паддзахадон университеты уырыссаг филологийы факультет. Кадджын мадзал райдыдта университеты кæрты поэты цыртдзæвæны цур. Архайдтой дзы Цæгат Ирыстоны паддзахадон университеты ректор Огъуаты Алан, проректортæ, ахуыргæнджытæ, кусджытæ, стæй студенттæ.
Мадзал байгом кодта уырыссаг филологийы факультеты декан Толасты Иринæ. Уый зæрдыл æрлæууын кодта, Пушкины гуырæнбон Уæрæсейы кæй нысан кæнынц куыд уырыссаг æвзаджы бон, афтæ ма æрдзырдта поэтæн йæ 200 азы юбилеймæ университеты территорийыл скульптор Дзбойты Михаил цы цыртдзæвæн сæвæрдта, уый историйыл.
“Æрвылаз дæр ардæм æрбацæуынц филологтæ æмæ, уырыссаг æвзаг чи уарзы æмæ йын аргъ кæны, уыдон иууылдæр, цæмæй кад кæной поэты генийæн. Уырыссаг æвзаг у нæ удварны хъæздыгдзинад, нæ паддзахаддзинады бындур, æмæ адæмы иугæнæг ахсджиагдæр фадат”, – фæнысан кодта Толасты Ирина.
Официалон хайы фæстæ церемонийы архайджытæ сæвæрдтой дидинджытæ Александр Пушкины цыртдзæвæныл.
Уый фæстæ номарæн мадзал адарддæр кодтой ЦИПУ-йы зонад-иртасæн чиныгдоны. Ахуыргæнджытæ æмæ студенттæ бацæттæ кодтой виртуалон биографион экскурси Пушкины бынæттæм, рахицæн дзы кодтой поэты царды сæйраг цаутæ. Программæ баххæст кодтой уырыссаг филологийы факультеты студентты сфæлдыстадон номыртæй: зæлыдысты музыкалон æмæ вокалон уацмыстæ, стæй Пушкины æмдзæвгæтæ оригиналы, ирон, испайнаг æмæ сербаг æвзæгтыл.
Мадзал ахицæн ис Александр Пушкины ныстуаны видеоравдыстæй, кæцы арæзт æрцыд æрхъуыдыгонд зонды технологийы фæрцы. Уым поэт бузныджы ныхæстæ загъта уырыссаг филологийы факультеты ахуыргæнджытæн æмæ студенттæн, йæ ном æмæ йын йæ бынтæ кæй мысынц æмæ йын кад кæй кæнынц, уый тыххæй.
