Цæгат Ирыстоны Хетæгкаты Къостайы номыл паддзахадон университеты ацыд МГИМО-йы Æхсæнадæмон иртасæн институты «Фæссоветон паддзахæдты ног роль»-ы иртасæн программæйы разамонæг æмæ журнал «Æхсæнадæмон аналитикæ»-йы сæйраг редактор, зындгонд политолог Сергей Маркедоновы лекци.
Мадзал æрæмбырд кодта регионы ахуырадон æхсæнад, хицауадон уагдæтты æмæ бизнесы минæвæртты. Хъусджыты ‘хсæн ма уыдысты декантæ, ахуыргæнджытæ æмæ æхсæнадæмон ахастыты, журналистикæйы, истори æмæ юридикон факультетты студенттæ.
Фембæлд байгом кæнгæйæ, ЦИПУ-йы ректор Огъуаты Алан бузныджы ныхæстæ загъта уазæгæн йæ балцы фæдыл æмæ фæнысан кодта ЦИПУ æмæ МГИМО-йы академион æмгуыстады нысаниуæг. Уæлдай æргом здæхт æрцыд Стыр Кавказ æмæ Ныгуылæн Азийы иумæйаг раиртæстытæм – Уæрæсейы стратегион интересты центры регионтæ.
«Æхсызгон мын у Сергей Маркедоновы нæ университетмæ æрбахонын. Уырны мæ, Кавказы Уæрæсейы æддагон политикæйы фæдыл хъуыдытæ дзурын ахсджиаг кæй у нæ академион æхсæнадæн. ЦИПУ йæ хæсыл нымайы æрмæст зонындзинæдтæ бахъахъхъæнын нæ, фæлæ ма МГИМО-имæ активон академион æмгуыстады дæр ахсджиагдæр фæрстыты фæдыл архайын – Стыр Кавказы æмæ Ныгуылæн Азийы бæстæты проблематикæйы», – загъта Огъуаты Алан.
Лекци адих кодтой дыууæ тематикон хайыл: «Уæрæсе Кавказы æмæ Кавказ Уæрæсейы: политикæ æмæ идентондзинад» æмæ «Уæрæсейы æддагон политикæ 1991–2026 азты: интерестæ, нысантæ æмæ аргъдзинæдтæ». Докладгæнæг æрæмбырдуæвджыты акодта историон ретроспективæйы, лæмбынæг æркаст Уæрæсейы политикæйы трансформацийы этаптæм йæ хуссайраг арæнтыл, стæй ма радзырдта йæ сæрмагонд иртасæн фæлтæрддзинад Кавказы фарстайыл кусгæйæ.
Йæ раныхасы Сергей Маркедонов фæнысан кодта бынæттон конфликтты глобалон контекст. «Никæцы регион – фæнды Ази уа, фæнды Дард Скæсæн, фæнды Балтийы бæстæтæ – цæры хицæнæй. Кавказы фарстатæ бынæттон фарста не сты, фæлæ дунеон боны фæткы хай, комкоммæ баст сты æхсæнадæмон барады фæрстытимæ æмæ паддзахады банымайыны критеритимæ”, – загъта Сергей Маркедонов.
Уымæй уæлдай ма фæнысан кодта, академион раиртæстытæ æмæ практикон разамынд синтез кæныны хъæугæдзинад. Архайджыты ныхæстæм гæсгæ, абон сæйрагдæр хæс хуымæтæджы анализ нæу, фæлæ ма Кавказы уæрæсейаг паддзахаддзинады ивгъуыд фæлтæрддзинады æмбарынады бындурыл разамынд дæттыны ногдзинæдты райрæзт дæр.
Фембæлды архайджытимæ диалоджы хуызы лекцион хайы фæстæ студенттæ æмæ регионалон бизнес-æхсæнады минæвæрттæн фадат уыд эксперттæн аныхас кæнын нырыккон геополитикæйы сæйраг фæрстыты фæдыл.
Мадзал бацæттæ кодтой Цæгат Ирыстоны сæргълæууæджы администраци, Уæрæсейы промышленникты æмæ амалхъом адæмы цæдисы (РСПП) Цæгат Ирыстоны регионалон хайад æмæ ЦИПУ. Лекцийы нысан уыд фæсивæды политикон ахуырдзинад фæхуыздæр кæнын, ног экономикон реалондзинады хуссайраг регионты бынат алыварсон цæстæнгас хъомыл кæнын, фидæны профессионалты критикон хъуыдыкæнынад æмæ активон æмбæстагдзинад рæзын кæнын.
В СОГУ состоялась публичная лекция эксперта МГИМО Сергея Маркедонова