Цæгат Ирыстоны ацыд МГИМО-йы æртыккаг сæрдыгон скъолайы бахгæды кадджын мадзал. Архайдтой дзы МГИМО, Цæгат Ирыстоны паддзахадон университет, Цæгат Кавказы хæххон-металлургон институт æмæ Хæххон паддзахадон аграрон университетæй 82 студенты.
Фондз боны дæргъы Сæрдыгон скъолайы архайджытæ байхъуыстой Цæгат Ирыстоны паддзахадон университеты факультетты деканты лекцитæм, архайдтой мастер-классты æмæ командон мадзæлтты, базыдтой ирон æвзаджы æмæ национ кæфтыты бындурон зонындзинæдтæ, бабæрæг кодтой Цæгат Ирыстоны нывæфтыд бынæттæ Алагир æмæ Дыгургомы. Уым базонгæ сты республикæйы культурæ, традицитæ, æмæ туристон потенциалимæ.
Программæйы сæрмагонд бынат бацахста Беслæны 1-æм скъола бабæрæг кæнын. Архайджытæ базыдтой 2004 азы сентябры трагикон цауты тыххæй, бабæрæг кодтой мемориалон комплекс æмæ амæттæгтæн номарæн кад скодтой. Радзырдтой сын Беслæны цæрджыты хъæбатырдзинады тыххæй æмæ трагедийы мысынад бахъахъхъæнын æмæ йæ фидæны фæлтæртæм хæццæ кæныны ахсджиагдзинады тыххæй.
Ахуырадон программæйы фæстиуджытæм гæсгæ архайджытæн лæвæрд æрцыдысты Сæрдыгон скъолайы курс æнтыстджынæй каст фæуыны бæлвырдгæнæг дипломтæ. Студенттæн хæрзиуджытæ радта Цæгат Ирыстоны Сæргълæууæджы уынаффæгæнæг Гайты Зауыр. Æрæмбырдуæвджытæм дзургæйæ, Зауыр фæнысан кодта, зæгъгæ, проекты сæйраг нысан уыд республикæ æмæ йæ адæмы базоныны фадат.
«Сæрдыгон скъола арæзт у уый тыххæй, цæмæй бауарзат нæ бæстæ, Ирыстон, стæй йæ истори, культурæ, традицитæ æмæ адæмы. Фæнды нæ, цæмæй ардыгæй ацæуат æрмæст ног зонындзинæдтимæ нæ, фæлæ ма хъарм мысинæгтимæ, стæй ногæй æмæ ногæй æрыздæхат Цæгат Ирыстонмæ, куыд нæ республикæйы хæлæрттæ», – загъта сæргълæууæджы уынаффæгæнæг.
Бузныджы ныхæстæ загъта МГИМО-йы æхсæнадæмон журналистикæйы факультеты æртыккаг курсы студенткæ Мария Кочегарова дæр:
«Цæгат Ирыстоны Сæрдыгон скъола мæ зæрдæмæ тынг фæцыд. Алы бон дæр афтæ хъæздыг уыд цаутæй, æмæ-иу райсомæй раджы рацыдыстæм æмæ-иу æрмæстдæр изæры фæстæмæ æрыздæхтыстæм, фæллад, фæлæ æнкъарæнтæ æмæ балцыты хъæздыгдзинадæй йедзаг. Мæнмæ гæсгæ нын, нæ цæстæнгас æмæ нæ фæлтæрддзинад зынгæ фæуæрæх кодта. Фидарæй мæ бон у зæгъын, бирæ азты дæргъы дæр ма кæй хъуыды кæндзынæн ацы рæстæг», – загъта уый.
МГИМО-йы сæрдыгон скъола арæзт цæуы Мæскуыйы дунеон ахастдзинæдты паддзахадон институт æмæ Республикæ Цæгат Ирыстон-Аланийы æмархайдæй. Проекты нысан у регионты ‘хсæн фæсивæдон æмархайд æмæ ахуырадон ивæндзинад рæзын кæнын, стæй студентты регионы историон æмæ культурон бынтимæ базонгæ кæнын. Ахуырадон программæйы ис хуыздæр экспертты лекцитæ, хицауады кусджытимæ фембæлдтæ, культурон мадзæлттæ, экскурситæ, архайджытæн фадат кæцытæ дæттынц, Цæгат Ирыстоны тыххæй арфдæр æмбарынад райсынæн æмæ йын йæ зонадон, ахуырадон æмæ туристон гæнæнтæ раргом кæнынæн, ахæмтæ.
82 студента стали выпускниками Летней школы МГИМО в Северной Осетии