Цæгат Ирыстоны Хетæгкаты Къостайы номыл паддзахадон университеты кадджын уавæры байгом МГИМО-йы сæрдыгон скъола. Ацы егъау ахуырадон проект æрæмбырд кодта МГИМО-йы 52 студенты, стæй 30 студенты та Цæгат Ирыстоны уæлдæр ахуыргæнæндæттæй -ЦИПУ, ЦК ХМИ æмæ ХПАУ-йæ.
Скъолайы байгомы мадзал ацыд Цæгат Ирыстоны паддзахадон университеты зал ЮНЕСКО-йы. Архайджытæн арфæ ракодтой Цæгат Ирыстоны сæргълæууæг Сергей Меняйло, Цæгат Ирыстоны паддзахадон университеты ректор Огъуаты Алан æмæ Уæрæсейы Фæсарæйнаг хъуыддæгты министрады цур МГИМО-йы университеты ахуырадон куысты хайады сæргълæууæг Анастасия Пузочкина. Уый бакаст МГИМО-йы ректор Анатолий Торкуновы хъусынгæнинаг. Официалон æгъдауæй байгом кæныны фæстæ скъолайы архайджытæн сæ бон уыд республикæйы сæргълæууæгмæ æргом диалоджы фæрстытæ раттын. Студенттæм æнхъæлмæ кæсы хъæздыг культурон-ахуырадон программæ 27‒31-æм июлы. Фыццаг бон райдыдта Цæгат Ирыстоны паддзахадон университеты историон факультеты декан Плиты Залинæйы лекцийæ «Алани-Ирыстойнаг историон-культурон бынтæ». Уый фæстæ Республикæйы уазджытæн сарæзтой экскурси Дзæуджыхъæуы историон центрмæ.
Сæрдыгон скъолайы программæйы ма ис командон мадзæлттæ этноквесты хуызы, ирон кафтæй мастер-класс, мемориалон комплекстæ «Беслан. Школа №1» æмæ «Барбашово поле»-мæ бацыд, стæй Фиагдонмæ балц. Ирон филологийы факультеты декан Гуытъиаты Эльмирæ та ма архайджытæн ратдзæн ирон æвзагæй интерактивон урок.
«Нæ университеты фыццаг хатт нæ цæуы МГИМО-йы сæрдыгон скъола. Уый у ахсджиаг къахдзæф бæстæйы раззагдæр университетимæ нæ дæргъвæтин æмгуыстад фæтыхджындæр кæныны хъуыддаджы. ЦИПУ-йы студенттæн уый у уникалон фадат хуыздæр практикæтæ райсынæн, сæ профессионалон зонындзинæдтæ фæуæрæхдæр кæнынæн æмæ æндæр регионтæй æмзонд адæймæгты ссарынæн. Æз æнæдызæрдыг дæн, ацы æмгуыстад нæ республикæйы разамындæн МГИМО-йы эксперттимæ ратдзæн хъомысджын импульс æрыгон профессионалты рæзтæн æмæ фæфидар кæндзæн Ирыстоны бынат, куыд Цæгат Кавказы ахуырадон хъæппæристы центр», – загъта ЦИПУ-йы ректор Огъуаты Алан.
МГИМО-йы сæрдыгон скъола Цæгат Ирыстоны цæуы æртыккаг хатт. Проект æххæстгонд цæуы Цæгат Ирыстон-Алани æмæ бæстæйы раззагдæр университеттæй иу – Уæрæсейы Фæсарæйнаг хъуыддæгты министрады цур МГИМО, 2023 азы Санкт-Петербурджы æхсæнадæмон экономикон форумы бафыст дæргъвæтин æмгуыстады бадзырдмæ гæсгæ.
