Цæгат Ирыстоны паддзахадон университеты Ахуырадон советы залы ацыд ирон филологийы факультеты рауагъдонтæн сæ дипломтæ райсыны кадджын мадзал. Ацы аз уæлдæр ахуырады æвдисæндартæ райстой 39 рауагъдоны. Се ‘хсæн уыдысты «Фыдыбæстæйон филологи» æмæ «Педагогон ахуырад»-ы бакалавртæ ирон, уырыссаг æмæ англисаг дæсныйæдтимæ, стæй магистратурæйы рауагъдонтæ.

Кадджын мадзал байгом кодта ирон филологийы факультеты декан Гуытъиаты Эльмирæ. Рауагъдонтæн раарфæ кодта сæ ахуыр æнтыстджынæй фæуыны фæдыл, йæ цæст сын бауарзта профессионалон æнтыстытæ, разæнгарддзинад, сæ равзæрст фадгуытыл æнувыддзинад, бахахх кодта ирон æвзаг æмæ культурæ бахъахъхъæнын æмæ рæзын кæныны ахсджиагдзинад.

Рауагъдонтæн сæ дипломтæ радтой ЦИПУ-йы экономикæ æмæ академион интеграцийæ проректор Зæгæлты Зæлинæ, Цæгат Ирыстоны фысджыты Цæдисы сæрдар Хозиты Барис æмæ зындгонд лингвист, филологон зонæдты кандидат Олег Беляев.

Рауагъдонтæн арфæ кæнгæйæ, Зæгæлты Зæлинæ фæнысан кодта мадзалы символизм Адæмты иудзинадæн нывондгонд аз.

«Абон уæлдай ахсджиаг у нæ мадæлон æвзагæн аргъ кæнын, бахъахъхъæнын æй, рæзын кæнын æмæ йæ фидæны фæлтæртæм дæттын. Сымах рахæсдзыстут ирон æвзаг æхсæнадмæ, парахат кæндзыстут, цæмæй хъуыса, цæра æмæ баззайа нæ культурæйы æнæфæхицæнгæнгæ хайæ», – бахахх кодта уый.

Олег Беляев фæнысан кодта, зæгъгæ, ирон филологийы факультеты рауагъдонтæн сæ бон у сæрмагонд роль æххæст кæнын ирон æвзаг бахъахъхъæнын æмæ рæзын кæныны хъуыддаджы.

«Ирон филологийы факультеты рауагъдонтæн сæ бон у сæрмагонд роль æххæст кæнын, уымæн æмæ хорз зонынц æвзаджы традици, дзурынц иронау сыгъдæг, æмбарынц ын йæ уникалон æууæлтæ. Уый гæнæн ис, æмæ ахъаз кæна ирон æвзаг активондæр парахат кæнынæн æхсæнады. Ныфс нæ ис, нæ куыст дæр кæй баххуыс кæндзæн ирон æвзаджы хицæн миниуджытæ æххæстдæрæй равдисынæн. Факультеты студенттæ сты курдиатджын, æмæ мæ ныфс ис, уыдонæн дæр æхсызгон кæй уыдзæн немæ кусын, махæн семæ кусын куыд æхсызгон у, афтæ», – загъта ахуыргонд.

Кадджын мадзалы кæронбæттæны рауагъдонтæ уазджытæн равдыстой видеоæрмæг, æвдыст дзы æрцыдысты сæ студентон царды зынгæ цаутæ.

Выпускникам факультета осетинской филологии СОГУ вручили дипломы