Цæгат Ирыстоны фыццаг хатт ацыд «Журналист года»-йы хорзæх дæттыны церемони, æрæмбырд кодта телеуынынады, радиойы, мыхуыры æмæ интернеты фæрæзты минæвæртты, пресс-службæты, фотожурналистты, операторты æмæ сæ профессионалон карьерæ нырма ныр кæмæн райдыдта, уыцы æрыгон профессионалты.
Кадджын мадзал снысан кодтой национ журналистикæйæн бындур æрæвæрæг, ирон æвзагыл фыццаг периодикон мыхуыр «Ирон газет» («Осетинская газета») куы рацыд, уый 120 азы бонмæ.
25 азы онг æрыгон профессионалтæн номинаци «Фыццаг къахдзæфтæ»-йы уæлахиздзаутæ систы ЦИПУ-йы журналистикæйы факультеты студенттæ æмæ рауагъдонтæ: æртыккаг къæпхæн райста студент Бирæгъты Марат, дыккаг къæпхæн 4-æм курсы студенткæ Цориты Эльвирæ, фыццаг къæпхæн та лæвæрд æрцыд ЦИПУ-йы журналистикæйы факультеты рауагъдон æмæ Радиокомпани «Алания»-йы корреспондент Ганжа Вадимæн.
Уæлахиздзаутæн хæрзиуджытæ радта журналистикæйы факультеты декан Хæбæлаты Фатимæ. Бузныг загъта профессионалон æхсæнадæн, факультеты студенттæн æппынæдзух кæй æххуыс кæнынц, уый фæдыл.
«Нæ студентты уæлахиз фыццаг республикон преми «Журналист года» у куыд сæ сæрмагонд æнтыст, афтæ нæ ахуырады хæрзхъæд æвдисæн дæр, ирон журналистикæйы 120 азы размæ ныффидаргонд традицитæ хорз къухты кæй сты, уымæн æвдисæн. Арфæ кæнын нæ студенттæн æмæ мæ уырны, уый кæй у æрмæстдæр райдайæн сæ дæргъвæтин балцæн журналистикæйы», – загъта Хæбæлаты Фатимæ.
Конкурсмæ балæвæрдтой 200 куыстæй фылдæр. Æппæт бавдыст куыстытæн дæр аргъ кодтой сусæг хъæлæсæппæрстæй Цæгат Ирыстоны Журналистты цæдисы 12 коллегийы уæнджы сконды жюри. Сæ сæрдар уыд Уæрæсейы культурæйы сгуыхт кусæг, сгуыхт журналист, Æппæтуæрæсеон паддзахадон телерадиокомпанийы генералон директоры хæдивæг Сабитов Рифат. Куыстытæ аргъгонд цыдысты 10 баллы къæпхæнмæ гæсгæ. Профессионалон конкурс сарæзта Уæрæсейы Журналистты цæдисы регионалон хайад, генералон партнер та уыд Санкт-Петербург æмæ Ленинграды облæсты
ирон æхсæнад.