Цæгат Ирыстоны паддзахадон университеты ацыд фембæлд «Студентон спорты райрæзт: нырыккон зындзинæдтæ æмæ ног фадæттæ». Ныхас цыд, студентон спорты рæзтимæ хицауады æххуысыл спортивон хъæппæристæн, стæй университетты, хицауадон уагдæтты æмæ спортивон æхсæнадты æмгуыстадимæ баст нырыккон фарстатыл.
Фембæлд арæзт æрцыд Национ Студентон хъæбысхæсты лигæйы спортивон-ахуырадон цæттæгæнæн æмбырдты фæлгæтты, кæцы æрæмбырд кодта 80 студент-спортсмены æппæт Уæрæсейæ. ЦИПУ-йы цæуынц ныр дыккаг аз фæд-фæдыл.
Фембæлды архайдтой фæсивæдон политикæ æмæ административон куысты фæдыл ректоры хæдивæг Кокайты Алан, Национ студентон хъæбысхæсты лигæйы президент Остъаты Мурат, Ассоциаци «Националон студентон хъæбысхæсты лигæ»-йы вице-президент æмæ ЦИПУ-йы физкультурæ æмæ спортивон дисциплинæты теори æмæ методикæйы кафедрæйы доцент Багаты Вячеслав, студентон уæгъдибар хъæбысхæсты командæйы хистæр тренер æмæ Дагестаны республикæйы хъæбысхæсты федерацийы вице-президент Махмуд Магомедов, Цæгат Ирыстоны 23 азмæ фæсивæдон командæйы сæйраг тренер Æрчъегкаты Тотраз æмæ ЦИПУ-йы Студентон спортивон клуб «Алания»-йы директор Мæхъиты Анзор.
Кокайты Алан бузныджы ныхæстæ загъта Национ Студентон хъæбысхæсты лигæйæн йæ æмгуыстады тыххæй æмæ фæнысан кодта, зæгъгæ, ахуырадон æмбырдтæ дыккаг аз фæд-фæдыл ауадзын кæй уыд фадат ЦИПУ-йæн æрмæст алы регионтæй спортсменты райсынæн нæ, фæлæ ма сын алывæрсыг рæзтæн уавæртæ саразынæн дæр.
«Махæн ахсджиаг у спортсментæн æрмæст хорз цæттæгæнæн уавæртæ сифтонг кæнын нæ, фæлæ ма ахæм уавæр саразын, сæ бон кæм у райсын ног зонындзинæдтæ, хай кæнын фæлтæрддзинадæй æмæ рæзын куыд профессионалтæ. Уырны мæ, ахæм проекттæ дарддæр дæр кæй фидардæр кæндзысты студентон спорт æмæ фæбæрзонддæр кæндзысты йæ ахадындзинад университеты царды», ‒ загъта Кокайты Алан.
Æмбырды архайджытæ æруынаффæ кодтой ЦИПУ-йы физкультурæ æмæ спорты факультеты хæстон аивæдты кафедрæйы фæлгæтты хъæбысхæстæй тренерон совет саразыны гæнæнтыл.
«Тренерон совет араздзæн аккредитацийы æмæ уæлæмхасæн ахуырадон курсытæ тренертæн, Националон студентон хъæбысхæсты лигæйы ахуырадон æмбырдты чи баиу уыдзысты, уыдонæн. Ацы совет ма сараздзæн спортсментæн ахуырадон программæ. Уый æрбаиу кæндзæн специалистты, æрæвæрдзæн иугонд ахаст тренировкæты процессмæ æмæ сараздзæн уæлæмхасæн фæзуат тренертæн практикон фæлтæрддзинад кæрæдзийæн ивынæн», ‒ загъта Националон студентон хъæбысхæсты лигæйы президент Остъаты Мурат.
Архайджытæ ма æруынаффæ кодтой студентон командæтæн спортивон цæттæгæнæн центрты райрæзтыл æмæ спортсментæ æмæ тренертæн профессионалон рæзты фадæттæ парахат кæныныл. Национ студентон лигæйы нысæнттæй иу у ахуырадон уагдæттимæ æмгуыст кæнын æмæ Уæрæсейы иугонд командæтæн резервтæ аразынæн баххуыс кæнын.
Фембæлды кæронбæттæны архайджытæ æруынаффæ кодтой студентон спорты дунеон æмæ æхсæнрегионалон æмгуыстады фарстатыл, стæй æндæр уæлдæр ахуыргæнæндæтты студенттимæ хæларадон фембæлдтытæ аразыны гæнæнтыл.
