Цæгат Ирыстоны Хетæгкаты Къостайы номыл паддзахадон университеты студентты дыууæ проекты систы инновацион куыстуæттæн æххуысы фонды Æппæтуæрæсеон конкурс “УМНИК-2026” уæлахиздзаутæ.
Æдæппæтæй конкурсмæ балæвæрдтой 3400 курдиаты æппæт бæстæйы æрыгон иртасджытæй. Равзæрстой 500 проекты – 250 милуан сомы.
ЦИПУ-йы æрдзон зонæдтæ æмæ технологиты факультеты студент Танделаты Давид конкурсмæ балæвæрдта згæйы ныхмæ гальваникон аппликатор саразыны проект. Проекты нысан у æнцонвадат фæрæз саразын згæйы равзæрд æмæ парахаты ныхмæ. Йæ зонадон разамонæг уыд æрдзон зонæдты æмæ технологиты факультеты аспирант Татраты Ацæмæз.
Медицинон факультеты студенткæ Æфсæрæгты Виктория конкурсы фæуæлахиз йæ проектимæ «Керамикон æмæ цирконийы реставрациты хъахъхъæныны сæрмагонд гигиенон продуктты композици æмæ кондады процессы райрæзт». Проекты нысан у нырыккон стоматологон реставрациты эффективон æмæ æдас æххуысæн продуктты рæгъ саразын. Йæ разамонджытæ уыдысты химийы зонæдты доктор æмæ фундаменталон медицинæйы кафедрæйы доцент Саламты Наталья æмæ фармацевтон наукæты доктор æмæ фундаменталон медицинæйы кафедрæйы сæргълæууæг Царахаты Ларисæ.
Алы проектæн дæр лæвæрд æрцæудзæн 500 мин сомы, уый руаджы æрыгон ахуыргæндтæн сæ бон уыдзæн хъæугæ иртæстытæ аразын æмæ, фæстагмæ, ерысхъом, инновацион продукттæ цæттæ кæнын.
Студенты СОГУ выиграли гранты конкурса инновационных проектов «УМНИК-2026»