Цæгат Ирыстоны паддзахадон университеты ацыд Ахуырадон советы æмбырд, архайдта дзы Уæрæсейы Федерацийы наукæ æмæ уæлдæр ахуырады министр Валерий Фальков. Хуссар Ирыстонмæ кусгæ балцы фæстæ министр бабæрæг кодта университет.
Ахуырадон советы æрбадт байгом кодта ЦИПУ-йы ректор Огъуаты Алан Цæгат Ирыстоны паддзахадон университеты абоны уавæры фæдыл докладæй. Ректор фæнысан кодта студентты нымæцы рæзт, уыдоны хыгъд студенттæ Уæрæсейы 15 регионæй, стæй æрдзон зонæдтæ, медицинæ æмæ педагогон фæзилæнты приоритетон рæзт. Уый æрдзырдта физикæйы, биомедицинæйы æмæ химийы бындурон зонадон проекттыл, афтæ ма нысаниуæгджын инфраструктурæйы модернизацийыл министрады æххуысæй, ахæмтæ куыд, ног бæстыхайы арæзтад æмæ цалцæггæнæн куыстытæ. Уый ма фæнысан кодта, университет дзуапп кæй дæтты Уæрæсейы Федерацийы ахуырад æмæ наукæйы министрады æппæт бæрæггæнæнтæн æмæ домæнтæн.
«Нæ университеты традицитæ, фыццаджыдæр, сты йæ адæм æмæ мысинæгтæ, мах кæй хъахъхъæнæм æмæ кæй архайæм фæбæрзонддæр кæнынмæ. Мах æххæст кæнæм министрады æппæт нысæнттæ, ныфсджынæй æрбакæнæм алы регионтæй фæсивæды æмæ нæ ахуырадон программæтæ ивæм ног æвзарæнтæн дзуапп дæттыны фæдыл. Министрады æххуысы руаджы мах аразæм нырыккон инфраструктурæ æмæ мæ зæрдæ дарын дарддæры позитивон динамикæйыл», – загъта Огъуаты Алан.
Йæ раныхасы Валерий Фальков университет схуыдта Цæгат Кавказы рагондæртæй иу æмæ фæнысан кодта, цæмæй кæдфæнды уа рæстæджы æвзарæнтæн дзуаппдæттæг раззагдæр интеллектуалон корпораци. Уый фæбæрæг кодта хорз демографион тенденцитæ 2031 азы онг æмæ æрсидт гуманитарон æмæ инженерон-техникон зонындзинæдты æхсæн æмвæзад бахъахъхъæнынмæ, раззагдæр зонадон-иртасæн центртимæ хызон программæтæ аразынмæ. Министр ма æрдзырдта кадрон фарстатыл, æрсидт æххуысмæ куыд ветерантæн, афтæ æрыгон ахуыргæнджытæн дæр, æргом аздæхта æрхъуыдыгонд зонды зындзинæдтæм, традицион аргълæвæрдтæй проектон хæслæвæрдтæм раивыныл акцент кæнгæйæ.
«Мах уæлдай хъусдард здахæм, сæ ахадындзинадæн аргъ кæнæн зын кæмæн у, ахæм уникалон регионалон университеттæм. Уыдонæй аразгæ у æрмæст Уæрæсейы Федерацийы цæрæг адæмы ахуырад нæ – æнæ фидар университетæй регионы æххæст рæзтæн хъæугæ аргъ кæнæн нæй. Сымах хъуамæ бæлвырд зонат, æрмæст уæ республикæйы социалон-экономикон рæзты нæ, фæлæ æнæхъæн Цæгат Кавказы дæр кæй ахсут сæрмагонд бынат. Уый у ахсджиаг, уый уæ мисси у. Æмæ æз æнкъарын, коллектив уый кæй æмбары æмæ йæ бæрнон хæс кæй æххæст кæны цæсгомджынæй», – загъта Валерий Фальков.
Æмбырды ма раныхас кодта спортивон-дзæбæхгæнæн комплекс «Дельфины» директор æмæ ЦИПУ-йы ветеран Дзобелаты Олик. Уый бузныджы ныхæстæ загъта Валерий Фальковæн йæ балцы тыххæй æмæ фæнысан кодта, федералон министртæй фыццаг кæй у, ЦИПУ-йы коллектив чи бабæрæг кодта.
Фембæлды кæронбæттæны Валерий Фальков ЦИПУ-йы коллектив схорзæхджын кодта Уæрæсейы Федерацийы зонад æмæ уæлдæр ахуырады министрады кады гæххæттæй ахуырады, наукон-иртасæн, æнувыд куысты зынгæ æнтыстыты фæдыл. Огъуаты Алан дæр министрæн скодта зæрдылдарæн лæвæрттæ: Уæрæсейы аивæдты академийы уæнг Черчесты Таймуразы конд скульптурæ, «Воин солнца» æмæ Хетæгкаты Къостайы уацмысты æмбырдгонд. Министры хæдивæг Айрат Гатиятовæн та хъæдæй нывæфтыд Уацамонгæ.
Ахуырадон советы æрбадты фæстæ министр æрзылд университеты фæзуатыл. Университеты кæрты Фыдыбæстæйы Стыр хæсты чи фæмард, уыцы студенттæ æмæ ахуыргæнджыты номыл цыртдзæвæны цур уазджытæ сæвæрдтой дидинджытæ.
Уæлдай æргом ма аздæхтой 4-æм ахуыргæнæн корпусы (“стекляшка”) цалцæгмæ дæр, кæцыйы, йе сцæттæйы фæстæ æрбынат кæндзысты æрдзон зонæдтæ æмæ технологиты факультет, стæй зонадон лабораторитæ. Цалцæггæнæн проекты тыххæй радзырдта проекты разамонæг, архитектор Бестауты Давид. Йæ ныхæстæм гæсгæ, куыст хъуамæ фæуа 2028 азмæ.
