ЦИПУ-йы концертон залы ацыд КВН-ы Æппæтуæрæсеон студентон конкурс «Кубок ректора. Играем всей страной»-йы Æхсæнрегионалон къæпхæн. Финалмæ рацыд Кадыровы номыл Цæцæны паддзахадон университеты командæ.
Ерыстæ арæзт æрцыдысты КВН-ы хъазты 65 азы юбилеймæ. Проект æрæмбырд кодта Уæрæсейы 130 университетæй фылдæр.
Æхсæнрегионалон къæпхæны архайдтой фондз командæйы: «Клинический юмор» (ЦИПУ), «4К» (ХПАУ), «Мед.City» (ЦИПМА), ЦКХМИ-йы æмæ Кадыровы номыл ЦПУ-йы командæтæ.
Жюрийы уæнгтæ уыдысты блогер, ТНТ-йы телеуынынады проект «Лига городов»-ы «Моя команда»-йы уæнг Æмбалты Витос, онлайн-портал «Основа»-йы сæйраг редактор Тохсырты Вадим, ТНТ-йы телепроект «Лига городов»-ы «Моя команда»-йы уæнг Кобаева Кристинæ, КВН-ы Республикæйы театры директор Плиты Сослан, разамынды паддзахадон университеты ректоры хæдивæг, проект «Кубок ректора»-ы разамонæг Павел Павловский æмæ Æхсæнадæмон КВН-ы цæдисы официалон лицензион редактор Джиоты Давид.
Командæтæй алчидæр бацæттæ кодта иу равдыст арфæйы ныхасы хуызы. Æртыккаг бынат бацахста ЦИПУ-йы командæ, дыккаг бынат бацахста ЦИПМА-йы командæ, фыццаг бынат та бацахста Кадыровы номыл Цæцæны паддзахадон университеты командæ. Уæлахиздзау командæ ацæудзæн конкурсы финалмæ 21 октябры Томскмæ.
Хорзæхджын кæныны мадзалы архайдта фæсивæдон политикæ æмæ административон куысты фæдыл ректоры хæдивæг Кокайты Алан. Уый арфæ ракодта командæтæн ЦИПУ-йы ректоры номæй, загъта сын бузныг сæ иттæг хорз архайды фæдыл, стæй сын радта хæрзиуджытæ.
Студентты КВН-ы конкурс “Кубок ректора. Играем всей страной” арæзт цæуы Уæрæсейы Федерацийы наукæ æмæ уæлдæр ахуырады министрад æмæ телеуынынады сфæлдыстадон иугонд «АМИК»-ы æххуысæй.
