Цæгат Ирыстоны Хетæгкаты Къостайы номыл паддзахадон университеты ацыд театралон критик æмæ Уæрæсейы паддзахадон сценикон аивæдты институты театралон аивæдты кафедрæйы доцент Мария Сизовайы лекци.
Фембæлд ацыд нырыккон уæрæсейаг драматургийы æрмадз «Современная драма на сцене. Прогноз на завтра»-йы фæлгæтты æмæ æрæмбырд кодта Уæрæсейы æмæ сыхаг бæстæты театралон æхсæнады минæвæртты. Лекцимæ æрбацыдысты Цæгат Ирыстоны паддзахадон университеты аивæдты, журналистикæйы æмæ уырыссаг филологийы факультетты студенттæ, университеты ахуыргæнджытæ æмæ кусджытæ, стæй сфæлдыстадон лабораторийы уазджытæ. Мария Сизова у театралон критик, аивадзонынады кандидат, драматургийы фестивальты куратор, стæй Уæрæсейы паддзахадон сценикон аивæдты институты театралон аивæдты кафедрæйы доцент. У Сергей Лавлинскийы редакцигонд «Словарь новейшей драматургии XX–XXI вв.»-ы æмавтор, мыхуыргонд æрцыд журналты «Театр», «Петербургский театральный журнал», «Современная драматургия» æмæ æндæр рауагъдадты.
Фембæлд байгом кæнгæйæ, ЦИПУ-йы аивæдты факультеты декан Атайты Мæдинæ æрдзырдта Дзæуджыхъæуы театралон традицитыл æмæ регионалон театртæн кадртæ цæттæ кæныны университеты бынаты тыххæй. Уый фæнысан кодта, факультеты театралон хайадæн кæй ис ахсджиаг нысаниуæг регионалон театралон культурæйы рæзты.
«Дзæуджыхъæу у хъæздыг театралон традицитимæ æмæ ахуыргонд театралон аудиториимæ горæт. Кæд чысыл у, уæддæр ам кусы авд паддзахадон театры, æмæ дзы алкæцы дæр ссары йæ аудитори. Уый махæн у нысаниуæгджын æнтыст, æмæ ахæм нысаниуæгджын культурон проекттæй республикæмæ цымыдисдзинад у дарддæры бæлвырдгæнæн, цæмæй Дзæуджыхъæу баззайа театралон царды ахсджиаг центрæй» — фæнысан кодта Атайты Мæдинæ.
Лекцимæ æрæмбырдуæвджытæн арфæ ракодта лабораторийы разамонæг Леонид Лучкин дæр. Мария Сизова йæ хъус æрдардта нырыккон уырыссаг культурæйы драматургийы бынатмæ. Уый архайджытæм бахатыд, цæмæй ахъуыды кæной, хъæздыг театралон традици кæмæн ис, ахæм бæстæйы абон адæмæн парахатæй зындгонд драматургты нæмæц афтæ гыццыл цæмæн у, уæлдайдæр та советон дугимæ абаргæйæ.
Лекцийы хицæн хайы уыдис, нырыккон драмæйы рæзтмæ цæст дарын æмæ ног авторты ссарынæн кæцытæ æххуыс кæнынц, ахæм ресурстæм æркаст. Мария Сизова ма æрдзырдта нырыккон драматургты сфæлдыстадыл æмæ уырыссаг драматургийы рæзты фæд ссарынæн фадат чи дæтты, ахæм уацмыстæм.
Уæ зæрдыл уын æрлæууын кæндзыстæм, ЦИПУ-йы аивæдты факультеты актерон хайады авд студенты æнтыстджынæй кæй ацыдысты æвзарæн, цæмæй архайой æрмадз «Современная драма на сцене. Прогноз на завтра»-йы. Санкт-Петербурджы режиссер Екатеринæ Шиховайы разамындæй кусынц скетчты инсценировкæтыл æмæ архайынц, йе сконды нырыккон пьесæты бакастытæ, драматургимæ фембæлдтæ, лекцитæ, мастер-класстæ кæцыйæн ис, ахæм программæйы.
Студентам СОГУ прочитали лекцию о современной российской драматургии