Цæгат Ирыстоны Хетæгкаты Къостайы номыл паддзахадон университеты факультетты ‘хсæн байгом 2026 азы футболæй Кубокыл спортивон турниры фæззыгон сезон.
Æдæппæтæй ерысты архайынц 22 командæйы университеты алы факультеттæй. Кубок цæуы дыууæ этапæй: къорды æмæ плей-офф. Фыццаг къæпхæны командæтæ хъазынц æмрæнхъ хъазтæй къордты. Къордты этапы фæстæ, хуыздæр бæрæггæнæнтæ кæмæн ис, уыцы командæтæ ахизынц плей-оффмæ. Матчтæ цæудзысты æртæ къуырийы дæргъы, кæронбæттæн хъазт нысангонд у 5 ноябрмæ. Хъазты фыццаг бон университеты мини-футболæй фæзтыл фембæлдысты ныртæккæйы чемпионтæ, экономикæ æмæ разамынды факультеты командæ «Экфак в городэ» æмæ юридикон факультеты «Матрицæ». Дыккаг фæзы ма ацы факультеттæй хъазыдысты ноджы дыууæ командæйы «DZANAG» æмæ «Прайс Барс».
Афтæ ма фыццаг бон фæзмæ рахызтысты физкультурæ æмæ спорты, æхсæнадæмон ахастдзинæдты, математикæ æмæ информатикæйы факультетты командæтæ.
Турнир сарæзта студентон спортивон клуб «Алания» æппæтуæрæсеон проект «УниверЛига»-йы фæлгæтты.
«Турнир аразгæйæ мах фыццаджыдæр нымайæм студентты зæрдæмæ цы цæуы, уый. Студентимæ æрныхас кодтам ерысты гæнæн форматтыл æмæ æрлæууыдыстæм Кубокыл, уый нын фадат дæтты спортивон цымыдисдзинад бахъахъхъæнынæн æмæ æппынæдзух матчтæ аразынæн. Ныр фæнд кæнæм ахæм турниртæ саразын фæззæджы æмæ уалдзæджы, цæмæй саразæм студентты фæлладуадзынæн активон æмæ зæрдæмæдзæугæ уавæртæ», — загъта студентты спортивон клубы директор Мæхъиты Анзор.
