Журналистикæйы факультеты студенткæ Мария Тамерьян фæуæлахиз Æппæтуæрæсеон зонадон-иртасæн куыстыты конкурс «История страны – история регионов»-ы.
Конкурс аразы Уæрæсейы наукæ æмæ уæлдæр ахуырады министрад гуманитарон наукæты Уæрæсейы паддзахадон университетимæ иумæ. Алы аз дæр æрæмбырд кæны студентты бæстæйы алы бынæттæй, цæмæй иртасой Уæрæсейы регионты истори, культурæ æмæ историон бынтæ. Архайджытæ сæ куыст æвдисынц æртæ категоримæ гæсгæ: историон эссе, курсон кæнæ рауагъдон квалификацион куыст. Конкурсы хатдзæгтæ фехъусын кодтой сæрмагондæй Национ иудзинады бонмæ.
Марияйы раиртæст «Путь домой: живое пространство Евгения Вахтангова» сси хуыздæр «Курсовая работа»-йы номинацийы. Йæ куысты сæйраг нысан — Дзæуджыхъæуы Вахтанговы хæдзар: номдзыд режиссеры бынтæ кæм цæрынц æмæ ног хуызтæ кæм исынц нырыккон культурæйы, ахæм бынат. Абон уый æрмæст ацы зынгæ театралон архайæгæн нывонд фæзуат нæу, фæлæ ма у егъау аивадон арт-объект, Цæгат Ирыстоны цæрджытæ æмæ уазджыты химæ æлвасыны сæйраг бынат. Вахтанговы хæдзары историйы фæрцы иртасæн æргом кæны, бæлвырд регионы культурон бынтæ æнæхъæн бæстæйы истори æмæ нырыккон царды хай куыд свæййынц, уый.
Куыд конкурсы уæлахиздзау, афтæ Мария хуынд æрцыд V историон медиа-скъолайы архайынмæ. Форум цæудзæн 11-æмæй 14-æм ноябрмæ Ижевскы Удмурты паддзахадон университеты.
Студентка СОГУ победила на всероссийском конкурсе с работой о Доме Вахтангова