Дзæуджыхъæуы Цæгат Ирыстоны Паддзахадон Университеты студенттæ сфæнд кодтой экологон акци «Поделись и переработай», зæгъгæ, саразын. Канд ныхæстыл нæ баззадысты, фæлæ йæ æххæст дæр скодтой.
Фæсивæд университеты дуармæ байгом кодтой иу чысыл фæзуат. Уырдæм адæмæй алкæй бон дæр уыдис зæронд пырх чингуытæ æмæ макулатурæ æрбахæссын. Мадзал аразджытæ сты экологон змæлд «Сансара» чи хуыйны, уыдоны активисттæ. Ахæм мадзал кодтой фыццаг хатт æмæ йæм сæхи тынг бацæттæ кодтой. Фæнды сæ цæмæй, ахæм акцитæм алчидæр йæ хъус аздаха.
Абон цы `рæмбырд кодтой, уыцы зæронд гæххæттытæ та арвитдзысты хауæддзæгтæ куыстгæнæг заводмæ. Мадзал аразджытæ куыд зæгъынц, афтæмæй алкæй бон дæр у семæ кусын.
Акци саразæг Дзаболаты Ларæ: «Мах ацы мадзал сарæзтæм «Ассоциация Зеленых вузов», зæгъгæ, уыдоны хъæппæрисимæ бастæй. Цæгат Ирыстоны Паддзахадон Университет уыцы къордмæ хаст æрцыд 5-æм июны. Цыдæриддæр зæронд гæххæттæй æрæмбырд кæнæм, уыдон ратдзыстæм заводмæ. Уым сæ дыккаг хатт бакусдзысты. Чингуытæй чи сбæзза, уыдон, махмæ гæсгæ, хорз сфидаудзысты уынджы библиотекаты дæр. Ахæм акцитæ фидæны дæр араздзыстæм. Кæй фæнды немæ кусын – табуафси, æнхъæлмæ йæм кæсæм!»