• 2018 азы университеты кусджыты премийы фонд уыд 1,5 милуан сомы. Наукон проекттæ бацæттæ кæнынæн уæлæмхасæн æфтиæгтæ уыдысты 24,5 милуан сомы бæрц. Ивгъуыд аз заказгонд наукон-иртасæн æмæ конструкторон куыстытæн университетмæ æрбацыд 8 милуан сомæй фылдæр, — загъта ректор. — 2018 азы университеты арæзт æрцыд 9 конференцийы, уыдонæй æппæты ахсджиагдæр — органикон химийæ V æппæтуæрæсеон конференци, архайдта дзы 600 адæймаджы, ахуыргæндтæ — дунейы 12 бæстæйы минæвæрттæ. Ядерон иртасæнты институты фыццаг иугонд информационахуырадон центр дæр махмæ байгом.
  • Паддзахадон аттестаци цы 34 адæймаджы ацыд æмæ, квалификаци чи райста, уыдонæй æрмæст дыууæ аспиранты бахъахъхъæдтой сæ диссертацитæ. Уый дзурæг у аспиранттæ, стæй сæ наукон разамонджыты лæмæгъ куыстыл. Махæн нæ хæс у ахуыргæндты ног фæлтæр хъомыл кæнын, архайын, цæмæй фæсивæд уой хъæппæрисджын æмæ цымыдис. Йæ диссертацийыл чи кусы æмæ Уæрæсейы æндæр уæлдæр ахуыргæнæндоны докторантурæйы чи ахуыр кæны, уыдонæн университет алывæрсыг æххуыс кæны бадзырдмæ гæсгæ. Ныртæккæ ЦИПУ-йы цæуынц иртасæн куыстытæ дзæбæхгæнæн косметикæ æмæ зайæгойтæй конд хосты къабазы. Уыцы фадат фæзындис, нæ университет Бетъырбухы паддзахадон химион-фармацевтон академи йæ цæст кæмæ дары, уыцы наукон-ахуырадон медицинон кластеры уæнг куы ссис, уæд.
  • 2018 азы математикæ æмæ информацион технологиты факультеты бындурыл курдиатджын хистæркъласонты пайдайæн байгом Яндекс-лицей. Ацы проект кусы Уæрæсейы æмæ Казахстаны, æдæппæт 58 горæты.
  • 2019-2020 ахуыры азты кæй байгом уыдзæн æфсæддон-ахуырадон центр, ахæм бар лæвæрд æрцыд Уæрæсейы æхсæз уæлдæр ахуыргæнæндонæн, уыимæ, мах университетæн дæр.
  • Куыд бирæ азты дæргъы, афтæ ныр дæр университеты ахуыр кæнынмæ бæллынц бирæ чызджытæ æмæ лæппутæ. Ацы аз сæ куырдиæттæ балæвæрдтой æртæ мин адæймаджы. ЦИПУ-йы фæсарæйнаг студенттæ ис 187 адæймаджы, 16 бæстæйы минæвæрттæ.
  • Ныртæккæ куыст цæуы сæрмагонд концепцийыл, цæмæй ЦИПУ-йы бындурыл арæзт æрцæуа Уæрæсе-Ирайнаг æмгуыстады ресурсон центр, ахуырад, наукæ, фæсивæдон политикæ æмæ туризмы рацарæзтыл. Фидæны стыр куыст цæудзæн ахуырады хæрзхъæддзинадыл, онлайн-ахуырады хуызтæй пайда кæнгæйæ, стæй фæсарæйнаг æвзæгты ахуырадон курсытæ байгом кæныныл.