Абон Цæгат Ирыстоны паддзахадон университеты скодтой хатдзæгтæ, Хетæгкаты Къостайы 160 азы райгуырæн бонмæ цы мадзæлттæ арæзт æрцыд, уыдонæн. Сæрмагондæй æрдзырдтой конференециты тыххæй, квестты æмæ конкурсты тыххæй. Нæ раздры æрмæджыты уын куыд хъуысын кодтам, афтæмæй нæ республикæйы мæйы дæргъы арæзт цыдысты бирæ алыхуызон мадзæлттæ ирон литературæйы бындурæвæрæджы номыл.
Цæгат Ирыстоны Хетæгкаты Къостайы номыл паддзахадон университеты къах авæрæн нал уыд. Абон ам æрæмбырд сты бирæ адæм. Уæлдæр ахуыргæнæндæтты кусджытæ, фысджытæ æмæ студенттæ. Уыдон æрбацыдысты, цæмæй сæхи цæстæй феной, Къостайы 160 райгуырæн бонмæ нæ республикæ, Къостайы ном хъуыды кæнгæйæ, цавæр мадзæлттæ сарæзта, уый. Университеты разамынд нын куыд бамбарын кодтой, афтæмæй афæдзы дæргъы уæлдæр ауыргæнæндон цыдысты конд бирæ алыхуызон æмбырдтытæ. Уыдон иууылдæр баст уыдысты Къостаимæ. Университеты президент Мæхæмæтты Ахуырбег куыд бафиппайдта, афтæмæй стыр куыст бакодтой «Ирон фæндыр»-ыл дæр.
2019 аз Цæгат Ирыстоны паддзахадон унивеситет йæхицæн снысан кодта Хетæгкаты Къостайы номыл. Уыйадыл университеты арæзт æрцыдысты Æппæтуæрæсеон наукон-практикон конференцитæ. Студенттæ ма абалц кодтой Цæгат Кавказы федералон зылдыл дæр. Уыдон базыдтой бирæ цымыдисаг æрмæг. Уыимæ ма Къоста кæм куыста æмæ кæм цард, уыцы бынæтты тыххæй дæр бæлвырддæр базыдтой. Уæдæ ма ацы бон ардæм æрбацыдысты бирæ уазджытæ дæр.
Абоны мадзал саив кодтой университеты студенттæ. Зæгъæм, историкон факультеты фæрцы арæзт æрцыдис цымыдисаг квест #Къоста 160 азы дæр. Йæ ном «Весь мир мой храм». Бацархайдтой дзы нæ республикæйы уæлдæр ахуыргæнæндæтты студенттæ æмæ аспиранттæ. Физикон-техникон факультеты студенттæ та равдыстой дзаумæтты сæрмагонд коллекци Хетæгкаты Къостайы 160 азы райгуырæн бонмæ.
Хетæгкаты Къостайы 160 азы райгуырæн бонмæ се’ппæтæй егъаудæр мадзал арæзт æрцыд интернеты тыгъдады. Уым ерыс кодтой викторинæтæ, конкурстæ æмæ тематикон квестты. Кæронбæттæны алы уæлахиздзауы дæр ЦИПУйы ректор Огъуаты Алан схорзæхджын кодта кады гæххæтытæй.